Shqipëria e hapur për investime

Nga data 6 deri në 9 Tetor të vitit 2006, në ambientet e Qëndrës Ndërkombëtare të Kulturës “Pjetër Arbnori”, u përurua panairi i titulluar “Shqipëria e hapur për investime” me mbështetjen e kryeministrit shqiptar.

Pjesmarrja e disa prej bashkive dhe komunave të Shqipërisë, si edhe e kompanive të fushave të ndryshme, sollën larmishmëri në paraqitjen e interesave të shumëllojshme në fushën e investimeve, disa prej të cilave përfshinin plane rregulluese, ambjente të gjelbëruara, qëndra turistike, projekte ndërtimi, etj.
Fjalën e hapjes në përurimin e këtij panairi e mbajti ministri i Ekonomisë z.Genc Ruli i shoqëruar me pushtetarë të tjerë të qeverisë.

Një prej prezantimeve të tilla ishte dhe promovimi i vlerave arkeologjike, arkitekturore dhe historike së “Tumës së Kamenicës” që ka bërë që Prefektura e Korçës, Këshilli i Qarkut dhe Komuna Mollaj ta identifikojnë këtë monument si një komponent të rëndësishëm të zhvillimit të qëndrueshëm të komunitetit lokal dhe të zonës së Korçës në përgjithësi.

Të gjitha këto institucione, së bashku me studiuesit dhe administruesit e trashëgimisë kulturore, synojnë nxitjen e projektit të Kamenices sipas standarteve bashkëkohore. Qëllimi i këtij projekti është shndërrimi i saj në një qëndër të vizitueshme, të pajisur me një muze të vogël, profili unik i të cilit të informojë vizitorët shqiptarë dhe të huaj për vlerat jashtëzakonisht interesante të kulturës tumulare të periudhës prehistorike të Shqipërisë juglindore dhe të gjithë trevave shqiptare.
Ky promovim i “Tumës së Kamenicës” u ndoq me interes prej më shumë se njëqind e pesëdhjetë personave, shqiptarë dhe të huaj, të grupmoshave dhe niveleve kulturore të ndryshëm, të cilët u informuan për rëndësinë e tumës jo vetëm nëpërmjet posterave dhe fotografive me paraqitje vizive por edhe të maketit plastik të Kamenicës që pasqyronte një pamje afër reales së tumës.

Në të asistuan vet kryetari i komunës së Mollaj, Fredi Xhemo, pjesëtarë të Prefekturës së Korçës, Drejtori i Muzeut Arkeologjik të Korçës, Prof.Dr. Skënder Aliu, Drejtorë të GSHASH Dr. Lorenc Bejko, Maria Grazia Amore dhe stafi i GSHASH (Valbona Hysa, Klodiana Kondo dhe Genti Përzhita) .

Nuk mungoi edhe interesi i mediave për këtë eveniment.

Ktheu Mbrapsht